Ég sé svo eftir að hafa ekki gerst djörf og tekið upp myndavélasímann og fest þetta kodak móment á mynd.
Við sáum tíbetskan munk, og það er ekkert bull í mér því ég er búin að fá það staðfest að það sé svoleiðis klaustur þarna í grendinni. Það brann fyrir stuttu og þeir byggðu það aftur, en það kemur þessu ekkert við. Hann var sveipaður dumbrauðu klæði og var í öðru appelsínugulu innanundir það. Hann var asískur í útliti, veðurbarið andlit sem bar gleraugu með þykkri svartri umgjörð frá sjöunda áratugnum. Hann var niðurlútur í aumýkt sinni og bar þögla visku. Það vantaði bara tígrisdýrið við hlið hans og keðju til að tengja þá saman.
Nema hvað, þar sem við sáum hann var í hvítlakkaðri upplýstri straumlínulagðri Apple búðinni hérna í mollinu þar sem hann var að versla sér iPhone.